Pasi i shënoi dy gol në ndeshjen e djeshme kundër Anglisë, Valon Berisha është shprehur krenar që është pjesë e skuadrës së Kosovës, duke shtuar se nuk e morën rezultatin që e deshën, por se do të vazhdojnë të përmirësohem.

Anglia shënoi fitore me rezultat 5:3 në ndeshjen e mbrëmshme
kundër Kosovës, në stadiumin e Southamptonit, “St.Mary’s”, duke i dhënë kështu
fund ecurisë së Kosovës prej 15 ndeshjeve pa disfatë, raporton Gazeta Express.

Berisha e nisi ndeshjen në mënyrën më të mirë të mundshme për
Kosovën, duke shënuar gol pas vetëm 35 sekondave lojë, ndërsa e nisi me gol edhe
fillimin e pjesës së dytë – duke kombinuar sërish me Vedat Muriqin.

“Krenar që jam pjesë e kësaj skuadre, për ta përfaqësuar
gjakun tim, vendin tim e familjen time. Mes të mirave e të këqijave, ne
gjithmonë qëndrojmë bashkë. Siç thonë ata: Të rritur nga lufta, më të fuqishëm
se frika”, shkruan Berisha në llogarinë e tij në Instagram.

“Frikësojuni vetëm Zotit dhe gjithçka është e mundur. Pas 7
muajve larg fushave për shkak të lëndimit, çfarë kënaqësie është të kthehesh në
fuqi, për ta shijuar atë që dëshiron ta bësh. Ndihem i bekuar”.

“Nuk e morëm rezultatin që e donim, do të vazhdojmë të
luftojmë dhe të përmirësohemi. Tifozët tanë janë më të mirët në botë, ju falënderojmë.
#planiizotit #zotiështëarsyeja #ibekuar #elhamdulilah #eduakëtëlojë #jemidardanët”.

Para se ta vizitonte Southamptonin të martën në mbrëmje,
Kosova kishte shënuar 10 fitore dhe kishte barazuar pesë herë të tjera në 15
ndeshjet e fundit. Humbjen e fundit e kishte pësuar në tetor të vitit 2017, në
një ndeshje kualifikuese kundër Islandës (2:0) për Kupën e Botës 2018.

Por, Raheem Sterling me një paraqitje brilante, duke shënuar
një gol dhe krijuar tri gola të tjera, i ndihmoi “Tre luanëve” të fitojnë dhe
ta ruajnë rekordin pa humbje që prej vitit 2009 në ndeshje kualifikuese për
Euro apo Botëror.

Skuadra e Gareth Southgate mbetet lidere e Grupit A me pikë
maksimale nga katër ndeshje. Kosova e Bernard Challandes, ndërkohë, zbret në
pozitën e tretë më 8 pikë, një pikë më pak se Republika e Çekisë në vendin e
dytë. Kjo pasi Çekia e mundi 3:0 Malin e Zi. /Gazeta Express/